Աւագ Հինգշաբթի. «Լսենք Քրիստոսի Սիրոյ Պատգամը Եւ Սիրենք Զիրար` Սէրը Դարձնելով Մեր
Կեանքին Առանցքը» Ըսաւ Արամ Ա. Կաթողիկոս
Հինգշաբթի, 28 մարտ 2013-ի առաւօտեան, Անթիլիասի Ս. Գրիգոր Լուսաւորիչ Մայր տաճարին մէջ
կատարուեցաւ առաւօտեան ժամերգութիւն, ապա Կարգ ապաշխարողաց եւ Ս. պատարագ մատուցուեցաւ`
Արամ Ա. կաթողիկոսի նախագահութեամբ: Մեծ թիւով հաւատացեալներ ներկայ գտնուեցան եւ հաղորդուեցան: Յետմիջօրէի
ժամը 4:00-ին, Մայր տաճարին մէջ Արամ Ա. կաթողիկոս կատարեց Ոտնլուայի սրտայոյզ արարողութիւնը:
Վեհափառ հայրապետը ղենջակ կապած, Յիսուսի տասներկու աշակերտները խորհրդանշող տասներկու
դպրեվանեցիներու, սարկաւագներու եւ վարդապետներու ոտքերը լուալէ ետք, տուաւ իր հայրապետական
պատգամը: Վեհափառ հայրապետը իր պատգամին մէջ ըսաւ. «Սէրը քրիստոնէական կեանքին էութիւնը
կը կազմէ: Սա սովորական հաստատում մը չէ եւ ոչ ալ սոսկ բնորոշումը քրիստոնէական կրօնին:
Ան աւելին է. չմոռնանք, որ Աստուած իր էութեամբ ու ստեղծագործութեամբ սէր է, սէրը Աստուծոյ
ստորոգելիներէն մէկը չէ. Աստուծոյ գոյութեան եւ ինքնարտայայտութեան, այլ խօսքով` յայտնութեան
մեկնակէտը եւ նպատակակէտը սէրն է: Չմոռնանք, որ մարդուն նկատմամբ ունեցած սէրէն մղուած,
Աստուած իր Որդին ղրկեց աշխարհ: Միշտ չմոռնանք, որ Աստուծոյ մարդեղացեալ Որդին աստուածային
նո՛յն սէրէն մղուած իր արիւնը թափեց մարդուն համար: Հետեւաբար, քրիստոնէութեան էութիւնը
սէր ըլլալով, նաեւ անոր պատգամը սէր է»: Անդրադառնալով Ոտնլուայի արարողութեան` վեհափառ
հայրապետը ըսաւ. «Ոտնլուայի արարողութիւնը այդ պատգամին շօշափելի արտայայտութիւններէն
մէկն է: Աստուած այնքան սիրեց մարդը, նոյնիսկ խոնարհեցաւ մարդուն առջեւ, անոր ոտքերը
լուաց, մեղքերը սրբեց եւ դէպի փրկութիւն առաջնորդեց: Հետեւաբար, լսենք Քրիստոսի սիրոյ
պատգամը եւ սիրենք զիրար` սէրը դարձնելով մեր կեանքին առանցքը»: Նոյն օրը, երեկոյեան
ժամը 7:00-էն մինչեւ ուշ գիշեր մայրավանքը խճողուած էր հաւատացեալ բազմութեամբ եւ յատկապէս
հայ երիտասարդներով, որոնք ներկայ գտնուեցան «Լացի գիշեր»-ուան խորհրդաւոր արարողութեան:
Խաչելութեան կարգի ընթացքին քարոզեց Թորգոմ վրդ. Տօնոյեան, որ հաւատացեալներուն փրկագործական
խորհուրդին մասին խօսեցաւ: Վեհափառ հայրապետին «Պահպանեա՛» աղօթքով ու Կենաց փայտի
օրհնութեամբ ուշ գիշերին հաւատացեալներ մեկնեցան մայրավանքէն` Աւագ հինգշաբթիի խորհուրդով
վերանորոգուած: